A competición, que medra respecto ao ano pasado, consolídase como unha cita de referencia para o baile deportivo en Galicia. O evento presentouse hoxe no Pazo Provincial coa participación do deputado de Deportes, Antonio Leira; a deputada de Mocidade, Yoya Neira; o concelleiro de Deportes da Coruña, Manuel Vázquez; e Sandra García, representante da academia Un Paso Adelante de Narón.
Participarán deportistas de Galicia, Madrid, Valencia e Portugal. Entre eles atópanse campións do mundo de danza coreográfica e parellas de primeiro nivel nacional. O programa inclúe competicións de bailes latinos e danza coreográfica en modalidades de solo, parellas e grupos, para diferentes idades e categorías, baixo a normativa da Federación Española de Baile Deportivo.
“"Superar os 300 participantes na segunda edición é unha magnífica noticia e demostra que esta Copa ten percorrido e futuro. Desde a Deputación queremos apoiar todas as modalidades deportivas, tamén aquelas que teñen menos visibilidade, pero detrás das que hai moito talento, esforzo e persoas que traballan cada día para seguir medrando."
Antonio Leira destacou o crecemento da competición e a importancia de apoiar disciplinas con alto nivel deportivo pero menor presenza mediática. Sinalou que a celebración desta competición sitúa A Coruña como escenario de grandes eventos deportivos e ofrece aos clubs locais a oportunidade de competir con deportistas de primeiro nivel.
“"Contar na nosa provincia con campións do mundo e deportistas de referencia é un orgullo e un estímulo para todos os clubs e escolas que traballamos cada día para impulsar o baile deportivo."
A entrada será libre e gratuíta para todo o público, que poderá achegarse ao Pazo dos Deportes de Riazor durante toda a xornada do sábado para descubrir unha modalidade que combina técnica, coordinación, expresión artística e esixencia física. A deputada Yoya Neira animou á cidadanía a asistir, destacando que a entrada gratuíta abre as portas a novos públicos e dá a coñecer o traballo dos clubs e escolas.
