O Concello de Cambre, xunto coa Asociación Xuvenil XentD100cia, organiza a IX edición da Open Science Cambre, unha cita científica consolidada que se desenvolverá os días 18, 19 e 20 de setembro. Espérase a participación de máis de 150 mozos e mozas procedentes de centros educativos de todo o país e doutros lugares do estranxeiro.
Baixo o lema 'prohibido non tocar', a iniciativa ofrecerá ao público espectáculos, xogos e experimentos deseñados e elaborados en centros educativos de diversas partes do mundo, fomentando a interacción e o descubrimento científico.
“"A Open Science é unha oportunidade para achegar a ciencia á veciñanza dunha maneira próxima e participativa e para facer de Cambre, durante toda unha fin de semana, un punto de encontro para mozos e mozas."
A alcaldesa, Diana Piñeiro, destacou a importancia do evento para achegar a ciencia á cidadanía de forma próxima e participativa, convertendo Cambre nun punto de encontro xuvenil. Agradeceu o traballo da asociación organizadora e animou á veciñanza a sumarse á iniciativa.
A feira científica abrirá as súas portas o xoves 18 de setembro en horario de 17:30 a 23:00 horas. O venres 19, o horario será de 12:00 a 19:00 horas, e o sábado 20, a xornada de clausura estenderase de 10:00 a 14:00 horas.
