O festival GRAVITEO Urban Sports Festival converterá o Paseo da Mariña e a Explanada do Parrote na Coruña nun epicentro de deportes urbanos do 18 ao 20 de setembro. O prato forte será o Psicobloc Master Series, unha modalidade de escalada na que o mar é parte fundamental da competición. Os participantes ascenderán por un muro de 16 metros de altura instalado sobre a auga, sen cordas nin arneses, onde a única protección será o propio mar.
O evento combinará catro competicións: psicobloc, escalada de velocidade e parkour, ademais de ofrecer experiencias para o público, música e unha zona gastronómica con food trucks. Impulsado pola Xunta de Galicia, a Deputación Provincial da Coruña e o Concello da Coruña, e co patrocinio de Estrella Galicia, o festival presentará probas internacionais, autonómicas e o Campionato de España de Parkour.
O psicobloc, tamén coñecido como Deep Water Soloing, naceu como unha forma de escalar sen seguridade sobre acantilados, caendo directamente ao mar. Na competición, estúcturas instaladas sobre a auga simulan estas condicións, esixindo técnica, forza e control mental. Para esta edición, erixirase un muro de 16 metros de alto e sete de ancho sobre o bordo do porto. Participarán 16 especialistas internacionais (oito mulleres e oito homes) en duelos eliminatorios.
A competición recupera unha ligazón coa cidade, xa que o Psicobloc Master Series tivo unha edición na Coruña en 2019. A modalidade, que revolucionou a competición dende a súa orixe en Bilbao en 2010, contará coa presenza de figuras destacadas como Chris Sharma, quen destacou o carácter espectacular do evento galego: «En Galicia teremos un gran evento de psicobloc. Vai ser espectacular, porque se escala sen cordas sobre o mar».
A escalada de velocidade gaña protagonismo co Open Galego de Escalada de Velocidade da FGM e o International Speed Open. Nesta disciplina, o obxectivo é ascender unha parede vertical de 15 metros no menor tempo posible. Dous deportistas compiten en rúas paralelas, onde cada apoio e cada décima de segundo son cruciais. Esta modalidade, cada vez máis accesible para o espectador, terá presenza nos Xogos Olímpicos de Los Ángeles 2028.
O International Speed Open reunirá especialistas nacionais e europeos, coa presenza de Erik Noya como embaixador. A proba permitirá medir o nivel deportivo do festival. O Open Galego de Escalada de Velocidade completará a oferta, brindando ao público dúas formas de gozar dunha das modalidades máis rápidas da escalada deportiva.
A terceira disciplina será o parkour, que celebrará o seu Campionato de España oficial, organizado pola Real Federación Española de Gimnasia (RFEG). O parkour transforma elementos urbanos como muros e barreiras nun percorrido creativo. O campionato terá dúas modalidades: Speed, para completar obstáculos no menor tempo, e Freestyle, que valora a dificultade, execución, creatividade e combinación de movementos.
O parkour español conta con referentes internacionais como Marta Gutiérrez (bronce na Copa do Mundo de Montpellier), Eduardo Oliva e Héctor Martínez (finalistas en Montpellier), e Stefy Navarro (finalista nos Xogos Mundiais de Chengdu).
Durante tres días, o Puerto de A Coruña será un punto de encontro de deporte e cultura urbana, combinando a tensión da escalada sobre o mar, a velocidade dos ascensos verticais e a agilidade do parkour, nun ambiente festivo con música e gastronomía.
