A décima edición do Festigual, o Festival das Artes Inclusivas organizado polo Concello da Coruña a través da Fundación Emalcsa, arrincou oficialmente coa gala 'Mulleres pola inclusión' no Teatro Rosalía de Castro. O evento reuniu sobre o escenario a Guadi Galego, Uxía, A Banda da Loba e Chungo Pastel nun concerto único creado para conmemorar unha década de compromiso coa cultura inclusiva.
O concelleiro de Cultura e Turismo, Gonzalo Castro, destacou o papel do Festigual como unha das iniciativas máis relevantes da cidade en accesibilidade cultural. "Festigual demostrou durante estes dez anos que a cultura é máis rica cando é accesible para todas as persoas. Este festival converteuse nun referente pola súa capacidade para construír espazos de encontro, participación e igualdade a través das artes", sinalou o edil.
A gala, presentada por Leti da Taberna e Corina Alfonso, tamén serviu como recoñecemento ao talento feminino que formou parte da historia do festival, con actuacións e colaboracións creadas especificamente para esta edición.
Desde a súa creación en 2017, Festigual traballa para eliminar barreiras de acceso á cultura. Ao longo das súas dez edicións, o certame desenvolveu máis de 160 actividades e espectáculos, contou coa participación dun milleiro de artistas e implicou 126 entidades e profesionais.
A gala marca o inicio de máis de dúas semanas de actividades gratuítas e accesibles en distintos espazos da cidade. A programación completa está dispoñible na web do festival.
