Esta instalación, situada dentro da factoría actual do grupo, representa un paso crucial cara a un modelo de produción máis sostible e competitivo. O vicepresidente de Operacións para Europa e Sudamérica de Ferroglobe, Alberto Fuentes, destacou que os traballos avanzan a "plena capacidade" para cumprir os prazos establecidos.
“"A nova planta de carbón vexetal de Sabón permitiranos reducir un 58% as emisións directas de CO2 á atmosfera mediante a substitución do carbón mineral por carbón vexetal. Ademais, utilizaremos a tecnoloxía máis eficiente do mercado, que nos permitirá tamén producir carbón vexetal a un custo moi competitivo."
A posta en marcha desta planta non só terá un impacto ambiental positivo, senón que tamén impulsará a economía circular en Galicia. Ferroglobe empregará biomasa local, o que fortalecerá o sector forestal da comunidade. A visita ás obras, realizada o pasado mércores, contou coa presenza da conselleira de Medio Ambiente, Ángeles Vázquez, e o alcalde de Arteixo, Carlos Calvelo.
Durante a visita, Alberto Fuentes aproveitou para facer un chamamento á Unión Europea, subliñando a necesidade de garantir un mercado competitivo e xusto. Recalcou que proxectos coma este non son viables sen condicións equitativas que permitan aos produtores europeos competir fronte a importacións desleais de terceiros países, que están a afectar gravemente a sectores industriais como o do silicio.
A nova fábrica de biocarbón dedicarase á produción de carbón vexetal mediante a descomposición química de madeira limpa, substituíndo parcialmente o consumo actual de carbón mineral. O recinto estará dividido en dúas zonas: unha para a recepción, almacenamento e procesado de madeira, e outra para a produción, integrándose na fábrica existente de Ferroglobe no parque empresarial de Arteixo.
