A mostra, que xa está aberta ao público ata o 10 de xaneiro, inclúe traballos sobre o mundo rural do Courel, a catástrofe do Prestige, a paisaxe atlántica, as máscaras do Entroido, retratos, cabalos e viaxes polo Caribe.
A rexedora destacou a importancia de recoñecer a traxectoria dun creador que dedicou décadas a documentar a realidade galega. "Esta mostra constitúe un merecido recoñecemento a unha vida dedicada á observación atenta do mundo, pero tamén unha oportunidade para que novas xeracións descubran unha obra que xa forma parte do patrimonio cultural galego", sinalou Inés Rey.
A exposición percorre proxectos representativos como 'Atlántico en la mirada. Finisterraes', 'Queimados', 'Onde só queda alguén para aguantar dos nomes. Os últimos labregos', 'Marea Negra. Nunca Máis', 'Quisqueya', 'Os cabalos do vento', 'Entroido. As máscaras da montaña', 'Retratos' e 'Post Ictus'.
Federico García-Cabezón, nado na Coruña en 1951, cursou estudos de Medicina e Fotografía en Santiago de Compostela e desenvolveu boa parte da súa actividade profesional como médico rural no Courel. Expón regularmente a súa obra desde mediados dos oitenta en Galicia, España e Portugal.
Ao longo da súa traxectoria obtivo diversos recoñecementos, entre eles o premio especial de fotografía Hoffman e o segundo premio do certame Luis Valtueña. Ademais, participou en publicacións e proxectos editoriais con figuras da cultura galega como Uxío Novoneyra.
A mostra inclúe textos de personalidades culturais como Yolanda Castaño, Xoel López, Javier Becerra, Diana Aitchison, David Ferreras e Tim Behrens.
