A alcaldesa, Inés Rey, presentou hoxe a edición 2026 do Trofeo Teresa Herrera, cualificándoa como "unha das máis especiais dos últimos anos". A cita coincide co 120 aniversario do Real Club Deportivo, o regreso do equipo á Primeira División e a celebración da eclipse total de Sol do vindeiro 12 de agosto.
Durante o acto, no que tamén participaron o concelleiro de Deportes, Manuel Vázquez; o conselleiro do Real Club Deportivo, Carlos Ballesta; e o presidente da AFAC, Juan Carlos Vázquez Veras, a rexedora destacou que o Teresa Herrera "forma parte da identidade da Coruña" e que o Concello aposta por un torneo "que non pertence só á historia, senón tamén ao futuro".
Nesta edición, o Deportivo masculino enfrontarase ao Real Madrid, reunindo aos dous clubs que máis veces conquistaron o trofeo, un cartel simbólico no ano do 120 aniversario da entidade coruñesa.
As entradas para o encontro xa están á venda para abonados e público xeral. Ademais, o Museo do Dépor acollerá unha exposición temporal sobre a historia do torneo durante a semana do evento.
A alcaldesa tamén subliñou a proxección internacional desta edición, que contará coa presenza do Deportivo, o Real Madrid e o Futebol Clube do Porto, e será retransmitida por Televisión Española e a Televisión de Galicia.
O Concello tamén preparou un operativo especial de transporte público para o 12 de agosto, día da eclipse e do partido, con servizos lanzadeira desde os aparcadoiros disuasorios cara ao estadio de Riazor.
Ao día seguinte, disputarase o Teresa Herrera feminino, co enfrontamento entre o Deportivo e o Futebol Clube do Porto. A rexedora destacou a importancia de impulsar o fútbol feminino e anunciou que cada entrada para este encontro permitirá visitar gratuitamente o Museo do Dépor ata o 30 de setembro.
Valorouse tamén o Mini Teresa Herrera, organizado pola AFAC, como unha cita que promove o deporte base.
A alcaldesa concluíu destacando que esta edición reúne "o 120 aniversario do Deportivo, o regreso á Primeira División, o reencontro co Real Madrid, o duelo internacional fronte ao Porto, a eclipse e a historia dun torneo que segue emocionando case oitenta anos despois", e afirmou que "A Coruña volverá demostrar a súa capacidade para organizar grandes acontecementos".
