O Concello da Coruña, a través do Servizo de Normalización Lingüística, retoma a programación do programa Apego para os meses de outono. Esta iniciativa está orientada a familias con nenos e nenas de entre 0 e 6 anos e desenvolverase nas aulas do Centro Ágora.
O obxectivo principal de Apego é a difusión de contidos culturais en galego, a dinamización da lingua e o fomento do contacto interxeracional a nivel idiomático. Busca proporcionar un ambiente de inmersión lingüística tanto para falantes habituais de galego como para aquelas familias que desexan achegarse á lingua dun xeito lúdico e didáctico. Abordaranse temáticas como a ecoloxía, a tradición cultural, a resolución de conflitos e os estereotipos de xénero.
O concelleiro de Cultura e Turismo, Gonzalo Castro, destacou que "Apego é unha desas iniciativas que crean comunidade e identidade dun xeito lúdico, divertido e adaptado aos nenos e nenas. O apoio a programas coma estes é fundamental para fortalecer e inculcar o uso da nosa lingua en todas as franxas de idade".
A programación de outono inclúe teatro, contos, obradoiros e música. O ciclo de actividades comeza o martes 29 de setembro co espectáculo "Festa de letras", de Iria Pinheiro, unha proposta que entrelaza historias sobre osos, meigas e libros, e que inclúe un obradoiro de teatro participativo.
A programación completa, que se estenderá de setembro a decembro, ofrecerá dous pases diarios (ás 17.00 e 18.30 horas) na aula 8 do Centro Ágora. Incluirá espectáculos como "Garavanciña" (Migallas Teatro), "Contos na pel" (Alma Blanco), "C@nto contigo" (Paco Nogueiras), "Monstros acústicos" (Chuches Amil), "A viaxe de Nano" (Raquel Queizás), "Xela, aventura na fraga" (Inma Soto) e "Tantarantiña" (Cris de Caldas). Tamén haberá obradoiros como "Obradoiro de chapas e tatuaxes" (Eduvía) e "Ilustres instrumentos musicais" (Laura Romero).
Todas as actividades son de balde e requiren inscrición previa os venres anteriores á data da actividade, ata completar a capacidade da aula.
