O novo contrato, adxudicado á UTE Ángel Roade - Jardinería Arce, busca garantir unha atención continua e integral aos case cen recintos deportivos da cidade, como o Palacio dos Deportes de Riazor, os pavillóns polideportivos, a Cidade Deportiva da Torre-Arsenio Iglesias e os campos de fútbol de San Pedro de Visma e Víctor Fernández Alonso.
O concelleiro de Deportes, Manuel Vázquez, destacou a importancia desta medida para responder ás necesidades específicas de cada recinto e actuar ante incidencias. O contrato tamén inclúe a instalación de sistemas de seguridade para traballos en altura nos pavillóns sen custo adicional para o Concello.
Vázquez sinalou que este investimento reforza a folla de ruta do Goberno de Inés Rey para renovar infraestruturas deportivas antigas, mellorando a accesibilidade e o confort para os usuarios.
Actualmente, estanse a executar melloras na Cidade Deportiva da Torre cun investimento de 1,5 millóns de euros na primeira fase da reforma dos vestiarios. Tamén se están a renovar os tapetes artificiais dos campos de fútbol de San Pedro de Visma, cunha achega de medio millón de euros.
Estas actuacións súmanse a traballos previos noutras instalacións como o campo de fútbol Víctor Fernández Alonso e a Leyma, onde se renovou o céspede artificial e se mellorou a accesibilidade de bancadas e vestiarios.
