O obxecto da intervención é acondicionar o ámbito para que poida ser visitado de xeito controlado polo público e de forma máis cómoda, compatibilizando as visitas cos criterios de protección e conservación do xacemento arqueolóxico. Tamén se busca mellorar a comprensión e interpretación dos restos por parte dos visitantes.
A obra realizarase co máximo respecto pola integridade do conxunto arqueolóxico, seguindo criterios de reversibilidade, mínima intervención e baixo impacto paisaxístico. Os elementos de mobiliario, de formigón para facilitar o mantemento, terán deseños específicos que minimizan a súa presenza no terreo.
O sistema de drenaxe dos camiños empregará pequenas canles con plantas herbáceas silvestres para integrarse na paisaxe. Os trazados dos camiños seguirán, na medida do posible, os xa existentes, que se corresponden con accesos tradicionais a antigos terreos de cultivo ou comunicación na zona.
A reutilización de antigos camiños para o acceso e movemento na zona arqueolóxica permite recuperar trazados históricos e tradicionais para o uso peonil, evitando a apertura de novos que poderían interferir con restos aínda non escavados.
As actuacións concretas inclúen o acondicionamento do aparcadoiro na Camiño das Penas da Grela, dos camiños de acceso á área arqueolóxica e do antigo Camiño de Mesoiro-Feáns (Camiño do Castelo). Crearanse dúas áreas de descanso xunto a este último camiño, afastadas dos restos arqueolóxicos.
Realizarase tamén unha instalación de iluminación de baixa altura entre o aparcadoiro e a área arqueolóxica, cun nivel reducido para evitar a contaminación luminosa. Ademais, acondicionarase vexetalmente a zona, creando prados nas áreas de canles de drenaxe e noiros, e na zona destinada a eventos no extremo sur.
O investimento total nos tres grandes proxectos de posta en valor do Castro de Elviña (melloras de accesibilidade, novo centro de apoio e valado perimetral) supera os 750.000 euros. O valado perimetral xa está avanzado e axudará á seguridade do recinto.
