O Concello da Coruña deu por rematadas as obras do novo aparcadoiro público situado na rúa Mestre Anta. Esta actuación busca regularizar unha zona onde xa se estacionaba de forma habitual, completando así unha reordenación que permite gañar varias prazas de aparcamento ao racionalizar e delimitar os espazos dispoñibles. Ademais, garántese a reserva de zonas específicas para persoas con mobilidade reducida (PMR).
A alcaldesa, Inés Rey, destacou que "Con esta intervención queremos satisfacer unha demanda veciñal, mais tamén buscamos definir claramente un espazos que estaban a ser utilizados de forma indebida por moitas persoas usuarias. Trátase de blindar a seguridade, compartimentando debidamente a vía para garantir o correcto estacionamento, o paso de vehículos ao longo da rúa, as áreas para colocar os contedores e, por suposto, as prazas PMR".
Esta intervención responde ás necesidades da veciñanza de mellorar os espazos de estacionamento nesta área da cidade. Non só se aumenta o número de vehículos que poderán facer uso das instalacións, senón que tamén se achega seguridade á contorna coa regularización, evitando estacionamentos indebidos e ocupacións perigosas da vía pública.
Esta actuación súmase a outra semellante que o Concello completou recentemente na avenida do Exército, na súa intersección coa rúa Río de Monelos. Alí tamén se realizou nova pintura no chan e unha delimitación clara das zonas de estacionamento en liña nunha vía de grande afluencia.
