O presidente da Deputación da Coruña, Valentín González Formoso, e o alcalde de Santa Comba, Alberto Romar, asinaron o convenio para financiar as obras. A Deputación achegará 196.181,60 euros (o 80% do orzamento), mentres que o Concello asumirá os 49.045,40 euros restantes. Tamén participou a concelleira Noelia Baleato.
Esta intervención busca mellorar as condicións de circulación e a seguridade nunha vía moi utilizada. O firme actual presenta un deterioro importante, con fochancas e problemas de drenaxe que fan necesaria unha actuación integral no pavimento e no sistema de drenaxe.
O proxecto abarca preto de catro quilómetros de rede viaria municipal, incluíndo os tramos entre Os Amezóns e Portochán (1.785 metros) e entre Portochán e Carboeiro (1.700 metros), ademais de ramais a Amezóns, Carboeiro e Portomadeiro.
Os traballos consistirán na reparación de zonas danadas e na aplicación dunha nova capa de aglomerado asfáltico de cinco centímetros de espesor. Incluirase tamén a limpeza e apertura de cunetas e a instalación de tubos de drenaxe para facilitar a evacuación da auga e evitar danos futuros ao firme. A limpeza de cunetas estenderase ata o límite municipal co Val do Dubra.
Para reforzar a seguridade, instalaranse tres redutores de velocidade no tramo entre Os Amezóns e Portochán. Ademais, renovarase a sinalización horizontal e vertical, con marcas nos bordos, sinais de stop, advertencia de redutores e placas identificativas dos núcleos de poboación.
Este convenio atende unha necesidade fundamental de conservación da rede municipal nun concello con máis de 135 núcleos de poboación, onde o mantemento das vías é crucial para os desprazamentos cotiáns e a actividade económica rural. O prazo de execución das obras é de catro meses.
