A institución provincial destina preto de medio millón de euros a apoiar proxectos de investigación e o perfeccionamento de estudos artísticos en centros nacionais e internacionais de prestixio. As axudas buscan facilitar que persoas da provincia poidan desenvolver proxectos ou completar a súa formación fóra da comunidade ou no estranxeiro.
A convocatoria de bolsas de investigación conta con 20 persoas beneficiarias e unha dotación global de 200.000 euros, distribuídas en cinco áreas de coñecemento: artes e humanidades (5 bolsas), ciencias (4), ciencias da saúde (4), ciencias sociais, xurídicas e estudos de xénero (5), e enxeñaría e arquitectura (2).
Os proxectos seleccionados abarcan desde o desenvolvemento de terapias CAR-T contra o cancro de pulmón e a resistencia aos antibióticos, ata a xestión forestal sostible, a integración de infraestrutura verde en polígonos industriais, estudos sobre a Biblia de Santo Domingo de Bonaval, o Galician noir, a participación comunitaria ou a vulnerabilidade estrutural de Galicia fronte a shocks xeopolíticos.
Pola súa banda, as bolsas de perfeccionamento de estudos artísticos benefician a 28 persoas cun orzamento de 280.000 euros. As axudas abranguen ilustración, artes plásticas e visuais, audiovisual, danza, artes do movemento, teatro, interpretación escénica e música.
Estas bolsas permitirán a especialización en disciplinas como interpretación musical (violín, violonchelo, clarinete, entre outros), danza contemporánea, formación actoral, produción artística, fotografía publicitaria, deseño de interfaces ou Concept Art, en centros de Madrid, Valladolid, Viena ou Basilea.
“"Apostamos polo talento da provincia da Coruña e apoiámolo para que poida medrar. Este programa facilita que mozos e mozas poidan formarse nos mellores centros a nivel nacional e internacional e desenvolver os seus proxectos de investigación cun apoio económico axeitado."
A Deputación consolidou este programa nos últimos anos, incrementando o número de bolsas de 40 a 48 e o importe de 8.000 a 10.000 euros, para adaptarse ao incremento dos custos formativos e de investigación.
