A Coruña suma un novo gran concerto á súa programación de 2027 coa confirmación da actuación de Dani Martín no Coliseum o 26 de xuño. Este concerto forma parte da xira "25 PTS AÑOS", coa que o artista madrileño celebra un cuarto de século de traxectoria musical e repasa os seus grandes éxitos, tanto en solitario como coa súa anterior banda, El Canto del Loco.
O propio cantante describiu estas actuacións como unha despedida dunha etapa artística significativa. A alcaldesa da Coruña, Inés Rey, destacou a importancia de traer de volta un artista de tal calibre á cidade, subliñando que a súa presenza no Coliseum "reforza unha programación musical que continúa medrando e que sitúa a Coruña entre as cidades capaces de atraer as principais xiras nacionais e internacionais".
Dani Martín é un dos artistas máis populares en España, con millóns de discos vendidos e cancións que forman parte da memoria colectiva. As entradas para o concerto saírán á venda o 10 de novembro ás 12:00 horas a través da páxina web oficial do artista e dos puntos de venda de El Corte Inglés.
A rexedora tamén fixo fincapé no impacto económico e turístico destes eventos. "Cada gran concerto que chega ao Coliseum contribúe a dinamizar a vida cultural da Coruña, atrae visitantes e reforza a imaxe da cidade como un dos grandes destinos de ocio e cultura do noroeste peninsular", afirmou, asegurando que a aposta é seguir construíndo unha programación diversa e de primeiro nivel.
A actuación de Dani Martín súmase a outros concertos xa confirmados no Coliseum para 2027, como os de Kase.O (16 de xaneiro), Sergio Dalma (23 de xaneiro), Abraham Cupeiro xunto á Orquestra Sinfónica de Galicia (29 de xaneiro), Scorpions (2 de maio), Cano (29 de maio) e David Bisbal (4 de xuño).
