A medida de presión, que se estenderá a un total de oito terminais aéreas en España, busca denunciar o que os sindicatos describen como un "deterioro das condicións laborais e o seu impacto na seguridade operacional". Segundo os representantes dos traballadores, o conflito non se debe a incidentes illados, senón a un problema estrutural que se arrastra dende hai anos.
A empresa foi diminuíndo efectivos sen repoñer axeitadamente as saídas, obrigando ao cadro de persoal a soster a operativa en condicións cada vez máis precarias.
Entre as causas que motivan esta convocatoria de folga, USCA e CCOO sinalan a cancelación de vacacións xa aprobadas, o uso excesivo das dispoñibilidades, cambios de quenda comunicados con escasa antelación, a falta de claridade nos cuadrantes sobre os descansos obrigatorios e prácticas organizativas irregulares en diversas dependencias. Estas situacións, segundo os sindicatos, "converteron en habitual o que debería ser excepcional".
Ademais dos aeroportos galegos de Alvedro e Peinador, a folga tamén terá repercusións noutras terminais como as de El Hierro, Fuerteventura, Xerez, La Palma, Lanzarote, Cuatro Vientos e Sevilla.
