A organización do festival Rock in Cambre confirmou este mércores a incorporación de Carlos Pereiro, tamén coñecido como Carlangas. O artista, que foi líder da influente banda indie Novedades Carminha, actuará no evento que terá lugar no Campo da Feira os días 25 e 26 de setembro. Carlangas súmase así a outros nomes xa anunciados como Boikot, Biznaga e Me Fritos and the Gimme Cheetos.

No municipio cambrés, Carlangas presentará o seu terceiro traballo en solitario, Universo Paralelo, publicado o pasado 29 de maio. Este disco marca un momento de consolidación na súa carreira musical tras a súa etapa con Novedades Carminha. Recentemente, o artista publicou sinxelos como Familia S.L., ademais de temas anteriores como Podría ser peor, que conta coa colaboración de Leiva, e Problemas, xunto a Dear Joanne.

A presente edición, a XXXIV, é unha das máis lonxevas da comarca e manterá o seu carácter gratuíto. A celebración a finais de setembro busca evitar coincidir con outras citas musicais na área coruñesa, segundo indicou o Concello. Hai uns meses, o grupo de goberno reuniu a formacións locais para explicar o sistema de elección dos próximos teloneiros do Rock in Cambre, que se decidirá nunha batalla de bandas este verán.

O cartel do festival de 2025 incluíu a bandas como Heredeiros da Crus, The Rapants, The Muppets, Ambiguo e Low Gain.