O vindeiro 20 de xullo de 2026, ás 19:00 h, terá lugar na Coruña, no Café de Macondo, unha sesión satélite do congreso CAMS2026. Baixo o título “Envellecemento e Calidade de Vida”, esta actividade aberta ao público busca achegar a investigación sobre o envellecemento á sociedade e fomentar o debate sobre como a ciencia pode mellorar a saúde e a calidade de vida na terceira idade.
A sesión estará moderada por Sandra Rego Rey (CICA, A Coruña) e contará coa participación de recoñecidos investigadores como Cleo Bishop (Blizard Institute, Queen Mary University of London, Reino Unido), presidenta da International Cell Senescence Association (ICSA); Estela Area Gómez e Ignacio Benedicto (ambos do Centro de Investigaciones Biológicas Margarita Salas, CIB-CSIC, Madrid); M. Carmen de Andrés (INIBIC, A Coruña); e a propia Sandra Rego Rey.
Os expertos achegarán diversas perspectivas sobre os mecanismos biolóxicos do envellecemento, a súa relación coa saúde e os desafíos para promover un envellecemento saudable. O formato será dinámico e participativo, con espazo para a interacción entre os relatores e o público asistente, seguido dun quenda de preguntas e debate.
Ademais, do 20 ao 22 de xullo, celebrarase o congreso Cellular Aging and Metabolism Symposium 2026 (CAMS2026) no Salón de Actos da Facultade de Ciencias da Saúde (Oza). Este evento reunirá a investigadores internacionais de primeiro nivel para a discusión científica e o establecemento de novas colaboracións.
A inscrición ao congreso é gratuíta e realízase en liña a través da web oficial do evento ([https://www.cams2026.com/](https://www.cams2026.com/)). Anímase aos interesados a presentar os seus resumos de abstracts a través do correo electrónico: contact@cams2026.com.
