O Goberno de Cambre presentará no pleno de xuño unha proposta para realizar unha transferencia de crédito co fin de garantir as subvencións destinadas ás Asociacións de Nais e Pais de Alumnos (ANPA) e á Escola Sementeira. Esta medida busca asegurar a continuidade da súa actividade mentres se atopa pendente a aprobación definitiva dos orzamentos municipais para o ano 2026.
Segundo explica o executivo local, o documento económico atópase actualmente en proceso de fiscalización e aínda non puido ser debatido en sesión plenaria. Para evitar que esta situación afecte ás entidades beneficiarias, o Goberno municipal impulsará unha transferencia de crédito específica que garanta os recursos comprometidos.
“"Co obxectivo de evitar que esta situación afecte ás entidades beneficiarias, o Goberno municipal impulsará unha transferencia de crédito específica que permita garantir os recursos comprometidos coas ANPA e con Sementeira, asegurando así a continuidade da súa actividade mentres non se completa a aprobación das contas."
O departamento correspondente está a traballar na localización das partidas orzamentarias e na dispoñibilidade de crédito necesaria para facer posible esta transferencia. A proposta será elevada ao pleno para o seu debate e posterior aprobación pola corporación municipal.
A alcaldesa, Diana Piñeiro, destacou que entre as súas prioridades atópase "protexer ás entidades beneficiarias de axudas" para garantir o seu funcionamento. Reiterou o compromiso do seu equipo para presentar "o antes posible" os presupostos municipais.
