A representante do Goberno autonómico destacou que Galicia acolle durante todo o mes de xullo un total de 40 efectivos especializados para reforzar a cooperación, a formación e o intercambio de experiencias na prevención e extinción de incendios forestais. A delegada da Xunta na Coruña, Belén do Campo, acompañada pola directora territorial da Consellería de Medio Rural, Nieves Mancebo, e polo xefe do Servizo de Prevención de Incendios Forestais, Guillermo Acebal, recibiu esta mañá na Delegación Territorial aos 20 bombeiros forestais procedentes de Bulgaria que participan durante esta primeira quincena de xullo no programa Europeo.
Esta iniciativa, impulsada pola Comisión Europea, busca mellorar a capacidade de resposta fronte aos incendios forestais mediante a cooperación internacional. Belén do Campo subliñou a importancia deste programa para protexer as persoas, o territorio e o patrimonio natural, e para dar a coñecer o modelo galego de prevención e extinción.
A misión desenvolverase entre o 1 e o 31 de xullo, con dúas quendas de 20 efectivos búlgaros. Os profesionais recibidos hoxe estarán en Galicia ata mediados de mes, e un segundo grupo tomará a substitución na segunda quincena. A súa base operativa está en Sergude, e a súa actividade coordínase pola Dirección Xeral de Defensa do Monte, desprazándose á provincia da Coruña baixo a coordinación do Servizo de Prevención de Incendios Forestais.
Durante a súa estancia, os bombeiros participan en actividades formativas e prácticas co persoal da Xunta para coñecer a organización e os medios do dispositivo galego. Tamén colaboran na extinción de lumes, integrados no operativo e baixo a dirección dos responsables autonómicos.
Este programa da Unión Europea é unha ferramenta para reforzar a cooperación entre Estados membros. Na campaña deste ano, a Comisión Europea mobilizou 777 bombeiros de 14 países, dos cales 185 veñen a España, distribuídos en territorios con alto risco estival como España, Portugal, Francia, Italia, Grecia e Chipre.
Belén do Campo lembrou que Galicia participa neste programa, consolidándose como referente en cooperación internacional contra incendios forestais, e agradeceu a disposición dos profesionais búlgaros, desexando unha estancia proveitosa que reforce a preparación europea fronte a este desafío común.
