A delegada da Xunta, Belén do Campo, visitou hoxe a Feira do Libro da Coruña, situada nos xardíns de Méndez Núñez, para coñecer o desenvolvemento dunha das citas culturais do verán na cidade. A feira permanecerá aberta ata o vindeiro luns 10 de agosto.
Durante a súa visita, Do Campo saudou ao ilustrador coruñés Jorge Blanco Cortés e mantivo encontros con representantes de librarías, editoriais e autores, agradecendo o seu traballo na programación que converte a cidade nun punto de encontro arredor da lectura.
A feira conta con 37 postos e ofrecerá máis de 300 sinaturas e 65 actividades, consolidándose como unha cita destacada do calendario cultural galego. A delegada salientou que é un "escaparate fundamental para o sector do libro" e unha oportunidade para "achegar a lectura á cidadanía, con propostas pensadas para todos os públicos".
Esta iniciativa forma parte do circuíto de feiras do libro promovido pola Xunta de Galicia dende o ano 2025, en colaboración coa Federación de Librarías de Galicia, cun convenio de máis de 220.000€. O obxectivo é fomentar o hábito lector, apoiar o comercio cultural de proximidade e dar visibilidade a editoriais, librarías e creadores.
A Feira do Libro da Coruña, que ofrece preto de 350 propostas culturais, é a décima das 13 citas programadas en Galicia. Tras a súa clausura na Coruña, o circuíto continuará en Viveiro (13-19 de agosto), Foz (20-23 de agosto) e rematará en Monforte de Lemos (26-29 de agosto).
Belén do Campo tamén subliñou o papel das librarías no impulso do hábito lector, citando o Barómetro de hábitos de lectura e compra de libros de España en 2025, que indica que o 65,9% de galegos len no seu tempo libre por ocio, un índice que aumentou nos últimos cinco anos.
