As novas paradas do transporte urbano no Obelisco e o Copacabana entrarán en servizo este luns, 20 de xullo. Nestes puntos xa se poden ver as marquesiñas instaladas para a espera dos usuarios. A posta en marcha destas paradas é necesaria para continuar co plan de traballos previsto no Cantón Pequeno e a Praza de Mina.
Na Praza de Mina e a súa contorna, as paradas de transporte urbano existentes serán anuladas provisionalmente para facilitar o avance das obras. Estas actuacións incluirán a remodelación das propias paradas, que volverán estar operativas posteriormente. Polo tanto, o Obelisco e o Copacabana concentrarán o tránsito de usuarios do autobús urbano que utilizan os Cantóns como punto de saída ou destino.
O Concello tamén avanza na remodelación do Cantón Grande. Esta semana traballouse no pavimentado inicial do novo carril-bici que rodea os xardíns de Méndez Núñez e na disposición da capa de rodadura nos carrís para o tráfico rodado.
Ademais, estanse a dar pasos firmes na construción da nova saída do aparcadoiro subterráneo e na creación dun futuro ascensor que conectará a superficie cos sotos do aparcadoiro, situado fronte á Fundación Barrié. A estrutura deste ascensor xa é visible.
A instalación deste novo ascensor mellorará substancialmente a accesibilidade, respondendo ás necesidades de persoas con mobilidade reducida e facilitando a subida e baixada de carriños de crianzas. A alcaldesa, Inés Rey, subliñou que as obras avanzan segundo os prazos previstos e que os novos Cantóns contarán con menos asfalto, máis zonas verdes e unha mellor accesibilidade.
