A intervención, que conta cunha subvención de 342.000 euros da Xunta de Galicia, está a ser executada pola empresa López Cao, adxudicataria do concurso público convocado polo concello de Arteixo. O obxectivo é revitalizar unhas instalacións que foron cedidas ao concello pola empresa Riofisa tras un acordo para solucionar o abandono dunha antiga propiedade privada afectada pola crise inmobiliaria.

A colaboración entre os tres municipios limítrofes busca converter o espazo nunha gran zona deportiva que dea servizo aos veciños de Arteixo, A Coruña e Culleredo, mellorando as instalacións e os servizos ofrecidos grazas á suma de recursos.

O complexo deportivo incluirá un edificio principal con vestiarios, aseos e salas polivalentes, ademais de zonas exteriores verdes equipadas con varias pistas deportivas e unha piscina ao aire libre.

As actuacións céntranse na rehabilitación, reparación, ampliación e modernización do equipamento. Destaca a substitución das actuais pistas de pádel por pistas multideporte, pensadas para dinamizar a práctica de disciplinas máis acordes coas preferencias dos veciños da contorna, devolvendo a funcionalidade ao complexo e ampliando os servizos previstos inicialmente.