A Concello da Coruña abriu este luns as inscricións para a XIV Carreira Popular de Novo Mesoiro, que se celebrará o domingo 22 de novembro ás 10.00 horas. Esta proba pon fin á décimo terceira edición do circuíto de carreiras nos barrios Coruña Corre.
A carreira absoluta terá unha distancia de 5.175 metros. Ademais, haberá seis categorías máis con percorridos reducidos adaptados a todas as idades. O trazado, maioritariamente por asfalto, partirá do pavillón municipal de Novo Mesoiro, na rúa dos Ancares, e percorrerá gran parte do barrio.
O circuíto Coruña Corre consolídase como un referente galego das carreiras populares e forma parte da aposta do Goberno de Inés Rey polo fomento de hábitos de vida saudables, involucrando aos barrios da cidade en actividades deportivas promovidas polo Concello.
As persoas interesadas poderán inscribirse ata o domingo 15 de novembro ás 23.59 horas. Tamén deberán confirmar a súa participación nesta carreira aquelas persoas que participen no circuíto completo. A recollida de dorsais realizarase o sábado 21 de novembro, de 11.00 a 20.30 horas, no centro comercial Cuatro Caminos. Toda a información está dispoñible en www.corunacorre.com.
