Os encontros, organizados pola UDC xunto co Instituto Superior de Engenharia do Porto, a Universidade NOVA de Lisboa e a Universidade do Minho, buscan ser un espazo para o intercambio de coñecementos e experiencias entre os ámbitos académico e investigador.
O International Conference on Structural and Civil Engineering (ICSCE 2026) centrarase nos avances e retos da arquitectura e enxeñaría civil, con especial atención á arquitectura sostible e intelixente e ao deseño funcional e artístico. Pretende favorecer o intercambio de novas ideas e oportunidades de colaboración científica e técnica, fronte aos desafíos medioambientais.
Pola súa banda, a décima edición do International Conference on Building Materials and Materials Engineering (ICBMM 2026) abordará os avances na investigación e desenvolvemento de materiais, clave para mellorar a eficiencia e sostibilidade das construcións. As áreas temáticas inclúen materiais de construción, semiconductores, orgánicos, poliméricos, nanomateriais, compostos e biomateriais.
Os congresos contan coa participación de persoal investigador do Centro de Innovación Tecnolóxica en Edificación e Enxeñaría Civil (CITEEC), incluíndo os grupos de Mecánica de Estruturas (GME), Construción (gCONS) e Estruturas Arquitectónicas (GEA). Destacan como relatores invitados Félix Nieto Mouronte, responsable da organización local, e Belén González Fonteboa, que presentarán sobre modelos substitutos en estruturas civís e estratexias de sostibilidade na construción.
Como complemento, os asistentes visitaron os principais laboratorios do CITEEC, coñecendo as súas instalacións e capacidades de investigación en estruturas, arquitectura e materiais.
