O segundo día de folga no sector siderometalúrxico da provincia da Coruña comezou cun endurecemento das protestas. Dende as 5:00 horas, piquetes informativos impediron o acceso de persoal á planta de Navantia, situada na ría de Ferrol.

Un portavoz dos traballadores en conflito explicou que a medida se tomou ao ter coñecemento de que "hai xente traballando 12 horas seguidas na plataforma", en referencia a unha embarcación que se atopa na zona de Carenas, é dicir, en proceso de reparacións. Segundo as súas denuncias, hai operarios que inician a xornada pola mañá e non saen nin sequera para comer.

Ademais, critican que a dirección de Navantia estaría a permitir que empresas subcontratadas incorporen persoal procedente do estranxeiro, quen realizarían xornadas de 12 horas diarias a turno corrido. Os manifestantes consideran esta práctica unha vulneración dos dereitos laborais.

A partir das 8:00 horas, os piquetes informativos estenderanse polos polígonos industriais da comarca. Está prevista tamén unha manifestación que partirá ás 12:00 horas dende a porta principal de Navantia e finalizará no porto de Ferrol.

O comité de folga sinala que manterán a presión mentres non se produza unha negociación real que garanta a vontade da patronal de acordar o novo convenio provincial. Para este mércores, 27 de maio, está programada outra xornada de folga no sector.