Este novo espazo, cun investimento de 111.000 euros antes de impostos, está deseñado para atender a demanda de áreas para mascotas na cidade, especialmente nas zonas da Sagrada Familia e Os Mallos. A área estará delimitada por un valado para separala do resto da zona verde e sumarase ás xa existentes noutros puntos da cidade como Eirís, Adolfo Suárez, Santa Margarita, Mesoiro e Bens.

Entre os elementos que se instalarán, destaca un obstáculo de “escalada agility”, composto por plataformas elevadas que os animais deberán percorrer. Este xogo busca fomentar a “valentía, a concentración e a obediencia”, ademais de acostumar os cans a enfrontarse a desniveis e alturas. Tamén se incluirá un balancín, que bascula co peso do animal e adestra a súa destreza e equilibrio, e unha pasarela estreita para mellorar a coordinación.

O circuíto contará tamén cunha mesa para practicar a obediencia, onde o can debe permanecer ata recibir unha orde, e unha “empalizada” con dúas ramplas inclinadas para reforzar a potencia muscular e a coordinación. Un túnel, deseñado para estimular a intuición e a confianza en espazos pechados, e obstáculos de salto con vallas a diferentes alturas completarán as instalacións. Os “trampolíns agility” permitirán aos cans realizar saltos controlados desde distintas plataformas, mentres que un slalom mellorará a súa velocidade e destreza técnica.