O orzamento total do programa, cuxas bases foron publicadas onte no Boletín Oficial da Provincia (BOP), aumenta un 9% respecto ao ano anterior, pasando dos 8,8 millóns de euros actuais aos 9,6 millóns previstos para 2027. Esta partida financiará preto de 380.000 horas de atención a domicilio e sostén 177 postos de persoal administrativo e técnico nos servizos sociais municipais.
A principal novidade deste programa é o incremento da achega económica da Deputación para o servizo de axuda no fogar (SAF). A partir de 2027, a Deputación achegará 16 euros por cada hora de atención prestada, fronte aos 14 euros de 2026, o que supón unha suba do 14,3%. Este aumento busca aliviar as contas municipais, especialmente nos concellos máis pequenos, e axudar a manter a atención diaria a persoas maiores que precisan apoio para seguir vivindo nas súas casas.
En concreto, destinaranse 6.071.860,16 euros ao SAF de libre concorrencia. Este servizo ofrece apoio a persoas que precisan axuda na vida diaria, sexan ou non dependentes recoñecidas. O concello de Ares é o que prevé máis horas de axuda no fogar, con 15.000 horas, seguido por Malpica de Bergantiños (12.796 horas), Neda (12.000 horas), As Pontes (10.300 horas), Sada (10.256 horas) e Vimianzo (10.000 horas).
Ademais, o programa destinará 3.559.451,40 euros a financiar os salarios e cotizacións á Seguridade Social de 177 profesionais dos equipos municipais de servizos sociais, dos cales 86 son persoal administrativo e 91 técnico. A achega anual da Deputación por posto de xornada completa será de 18.000 euros para persoal administrativo, 22.000 para técnico A2 e 26.000 para técnico A1.
As bases para 2027 actualizan a achega por hora de SAF e toman como referencia os módulos de 2026, permitindo aos concellos solicitar ampliacións ou reducións motivadas. O prazo de presentación de solicitudes abrirase o vindeiro mércores, 25 de novembro, e finalizará o 18 de decembro.




