A iniciativa busca achegar o patrimonio histórico da cidade á cidadanía mediante propostas didácticas e participativas. O programa inclúe visitas guiadas e obradoiros tanto no Castelo de San Antón como no Castro de Elviña, espazos clave para entender a evolución histórica da contorna.

As persoas interesadas en participar deberán formalizar a súa inscrición a partir do vindeiro martes 9 de xuño ás 10.00 horas. Aínda que todas as actividades son de carácter gratuíto, as prazas son limitadas e requiren reserva previa para garantir o correcto desenvolvemento das sesións.

A oferta cultural inclúe propostas específicas para o público infantil, de entre 6 e 12 anos, con talleres sobre cerámica prehistórica e escavacións simuladas. Pola súa banda, os adultos poderán participar en sesións de experimentación arqueolóxica que explican desde a prospección inicial ata a análise dos materiais atopados.