A familia que consolidou o Fu como un referente da auténtica cociña chinesa na Coruña suma un novo local na Praza de España, número 29. Tras o seu coñecido restaurante na rúa Torreiroiro e o Wok by Fu en Monte Alto, dan un paso máis cun proxecto que tiñan en mente dende hai tempo. "Asinamos o contrato de aluguer do local no ano 2023", sinala Wei Wei, responsable do establecemento.

O éxito do arranque, o pasado venres, foi notable, con máis de 200 persoas asistindo á festa de inauguración. O concepto céntrase nunha coidada selección de pratos que xa triunfaban noutros locais do Fu, adaptados a un formato buffet. "Eliximos ben os pratos para garantir a máxima calidade", afirma Wei Wei, mencionando opcións como a panceta guisada en soia vermella ou a berenxena salteada en salsa de soia. A cociña central, situada en Ángel Rebollo, garante a calidade e os sabores característicos da marca.

A proposta busca un formato máis pequeno e de barrio, centrado na cociña do norte de China, que atrae incluso a cidadáns chineses e equipos olímpicos cando visitan a cidade. "Queremos servir os mellores pratos aos veciños", resume Wei Wei. O sistema de buffet, onde os clientes se serven nunha bandexa compartimentada, evoca a memoria de comedores escolares e domésticos en China.

O local dispón de 24 mesas cunha capacidade para medio centenar de persoas. A comida renóvase constantemente antes dos servizos de xantar e cea. Ademais, planean implementar un servizo de almorzos proximamente. O prezo do buffet é de 20 euros (bebida á parte), e os nenos pagan a metade. Confían na responsabilidade dos clientes á hora de servirse, sen multas por sobras no prato. Tamén ofrecen unha opción para levar por 13,80 euros.