O sindicato acusa á patronal de manter unha actitude "inmobilista" e de non presentar propostas serias para mellorar as condicións laborais de miles de traballadores e traballadoras. Esta situación levou á realización de dúas concentracións este sábado, unha fronte ao Gadis da avenida de Esteiro en Ferrol e outra ante o Froiz situado no Centro Comercial de Narón.
Tras varias reunións sen resultados, a organización sindical cualifica de "tomadura de pelo" a postura das empresas, reprochándolles a falta de avances en aspectos como a recuperación do poder adquisitivo, unha subida salarial acorde ao incremento do custo da vida ou a redución da precariedade.
“"Non imos permitir que se siga empobrecendo á clase traballadora mentres as empresas manteñen ou incrementan os seus beneficios."
A CIG sostén que a falta de avances "non é casual", senón froito dunha decisión consciente da patronal para gañar tempo e desgastar á representación sindical. A organización pon o foco na realidade diaria do persoal do sector, marcada por salarios baixos, xornadas longas e irregulares, e horarios que dificultan a conciliación.
Ante esta situación, o sindicato anunciou que, se non se producen avances na reunión prevista para o vindeiro luns, 4 de maio, intensificará a presión coa convocatoria de dúas xornadas de folga. A primeira será o 15 de maio e a segunda o 23 de xuño. Fan un chamamento a todos os traballadores e traballadoras do sector para que se organicen e participen activamente nas mobilizacións.
