O alcalde de Carral, José Luis Fernández Mouriño, presentará este xoves unha proposta ao Pleno municipal co obxectivo de ceder unha parcela para a construción dunha futura residencia de maiores impulsada pola Xunta de Galicia. Esta iniciativa busca garantir a atención ás persoas maiores do municipio, ampliar os servizos e permitir que permanezan na súa contorna habitual.
A proposta contempla que o Concello facilite un terreo axeitado e comprométase a poñelo á disposición da Administración autonómica nun prazo máximo dun ano, tras unha identificación e selección conxunta. Os servizos técnicos e xurídicos municipais tamén se encargarán das xestións necesarias para o avance do proxecto.
O alcalde lembrou que este proxecto xa se intentou materializar durante a súa anterior etapa á fronte do Concello. En 2018, o goberno municipal liderado por Fernández Mouriño impulsou a tramitación dunha subvención para crear un centro de maiores nas antigas instalacións do colexio Víctor Velasco, aínda que aquel proxecto non chegou a concretarse tras un cambio de goberno.
A Xunta comunicou recentemente ao Concello que Carral é unha das localizacións seleccionadas para estas novas instalacións, cuxo fin é aumentar as prazas residenciais e facilitar que os maiores poidan residir na súa contorna. A Administración autonómica aclarou que esta manifestación de vontade non implica aínda a adxudicación definitiva do equipamento, que requirirá posterior tramitación administrativa.
Ademais da residencia, o Pleno abordará unha modificación de crédito de 429.442,77 euros destinada a instalacións deportivas, a aprobación do Plan Estratéxico de Subvencións 2026-2029, o convenio coa Asociación de Custodia do Territorio de Carral “Brexa”, o proxecto de humanización da rúa do Souto, a Conta Xeral de 2025 e unha bonificación do 50% do ICIO para a ampliación do CEIP Plurilingüe Vicente Otero Valcárcel.
