A Feira do Románico regresa a Negreira cunha nova data a finais de xuño, buscando mellorar a afluencia e os resultados do evento medieval que tradicionalmente se celebraba a principios de setembro. A cita medieval terá lugar entre o venres 26 e o domingo 28 de xuño.
A xornada inaugural, o venres, estará marcada por un desfile de fachos en honra ao trobador local Afonso Eanes, que se repartirán entre os asistentes vestidos de época. Este desfile comezará ás 22:30 horas. Ademais, un dragón xigante percorrerá a vila e haberá un espazo de ocio infantil.
A programación do venres inclúe a apertura do Mercado Medieval ás 18:00 h, seguida de actuacións musicais itinerantes con grupos como Turdión, Zeltia, Tripmalabar e Grimorium ao longo da tarde e noite. Destaca o espectáculo aéreo Innana ás 23:00 h no Campo da Feira.
O sábado 27 de xuño, o mercado medieval abrirá ás 11:00 h. A inauguración oficial da Feira do Románico será ao mediodía, coa participación de todas as compañías. A xornada contará con bufóns, música, espectáculos de cazadores de dragóns e exhibicións de cetrería con Falcons Galicia na Praza do Cotón ás 13:00 h. A tarde continuará con máis música e espectáculos itinerantes, culminando co espectáculo Suumbra de Troula Animación ás 22:30 h e fogos artificiais á medianoite.
O evento pecharase o domingo 28 de xuño. O mercado abrirá ás 11:00 h e a programación incluirá música itinerante, bufóns, espectáculos de dragóns e máis exhibicións de cetrería na Praza do Cotón. Pola tarde, o mercado reabrirá ás 16:30 h e continuarán as actuacións musicais e os desfiles. A clausura será ás 21:30 h cun pasacalles con todos os grupos, e o espectáculo de luz Vulcano ás 22:00 h na Praza do Cotón.
