A conselleira do Mar, Marta Villaverde, recalcou hoxe en Vigo que a dixitalización, a innovación tecnolóxica, a trazabilidade e a sustentabilidade son piares esenciais para asegurar a competitividade futura da cadea mar-industria galega. Fixoo durante a apertura do XIV Congreso Internacional Conxemar-FAO, celebrado na sede de Afundación, baixo o lema "Smart Blue Leadership: eficiencia, intelixencia e estándares globais para unha industria comprometida". O evento reuniu a especialistas de organismos internacionais, institucións públicas, a comunidade científica e o sector empresarial.
Villaverde salientou o papel de Galicia como referente na transformación tecnolóxica e sostible do sector. "Galicia non se detén a observar como se acerca o futuro tecnolóxico. Galicia está a construílo de xeito activo", afirmou, citando como exemplo a modernización das lonxas mediante Lonxas Galegas 4.0. Esta iniciativa permite a compra remota e o acceso a datos en tempo real, optimizando o control e a información sobre os produtos mariños.
A responsable autonómica, acompañada polo director xeral de Pesca, Acuicultura e Innovación Tecnolóxica, Isaac Rosón, tamén resaltou os avances en información e control con selos como pescadeRías, de onde se non?, a Plataforma Tecnolóxica da Pesca e a aplicación Trazamar. Engadiu o labor da Axencia Intecmar no control da calidade do medio mariño, ferramentas que reforzan a confianza do consumidor e responden á demanda de información sobre orixe, calidade, seguridade alimentaria e sustentabilidade.
Villaverde tamén incidiu na necesidade de que a innovación e a apertura comercial vaian acompañadas dun marco internacional que garanta unha competencia xusta. Lembrou a postura da Xunta a favor da inclusión de cláusulas espello nos acordos comerciais e de controis estritos para que os produtos de terceiros países cumpran esixencias equivalentes ás dos produtores comunitarios. "Entendemos que é esencial avanzar cara un comercio xusto e sostible, e tamén cara a unha competencia leal y equilibrada, baseada nas mesmas regras, garantías e controles para todos os produtos que compiten nun mercado como o europeo", declarou.
A conselleira valorou positivamente que o congreso aborde temas como a intelixencia artificial, a rastrexabilidade dixital, as novas tendencias de consumo, a competitividade internacional e as oportunidades da economía azul. O evento conta con expertos da FAO, o Banco Mundial, a Iniciativa para a Transparencia Pesqueira e o Global Dialogue on Seafood Traceability, entre outras organizacións.
Villaverde concluíu felicitando aos organizadores por converter Vigo e Galicia nun punto de encontro internacional para debater sobre o futuro dos produtos do mar. "En Galicia queremos seguir construíndo, entre todos, un futuro máis próspero e sostible para este sector tan estratéxico", rematou.
