O actual director da escola, o profesor José Fariña, explicou que o 20 de outubro de 1976 foi o primeiro día de actividade docente da Escola Técnica Superior de Enxeñeiros Industriais de Vigo, entón dependente da Universidade de Santiago de Compostela. Na conversa tamén participou o que fora primeiro director da escola, o exreitor Luis Espada, xunto cos exdirectores José Cidrás e Juan Pardo, quen rememoraron episodios históricos, incluíndo a unión en 2011 das antigas escolas.
O sábado continuarán os actos cun encontro institucional baixo o lema ‘Naceu, viviu, o futuro por vir’. A xornada comezará ás 10.45 horas coa recepción de asistentes, unha exposición de orlas e fotografías históricas, e espazos para empresas e networking.
A partir das 11.00 horas, o director José Fariña e a reitora da Universidade de Vigo, Carmen García Mateo, abrirán o acto, que incluirá unha mesa redonda con profesorado xubilado e directivos de empresas, e un relatorio sobre industria, talento e innovación.
Ás 12.30 horas presentarase o libro do 50 aniversario, elaborado polo Observatorio de Persoas Egresadas da Universidade de Vigo e presentado polo seu director, o profesor Luis Espada, que recolle medio século de historia dos estudos de Enxeñaría Industrial.
Ademais, a sede cidade da escola acollerá a partir do xoves 29 ás 19.30 horas unha exposición sobre O Destornillo, a antiga festa estudantil da Escola de Peritos Industriais iniciada en 1954, baixo o lema Contra todo, porque si.
