O proxecto permite aos estudantes do campus de Pontevedra pór en práctica e mellorar a súa formación, experimentando de maneira real o proceso de creación dunha ficción audiovisual. A webserie realízase no marco do taller Celanova, plató de ficción, incluído na programación do Curso de Medio Audiovisuais de Celanova que organiza a Fundación Carlos Casares e a Facultade de Comunicación, co apoio da Universidade de Vigo, a Deputación de Ourense e Agadic.
Tras a fase de preprodución, que incluíu o traballo en distintas versións do guión e a procura de localizacións e actrices, o alumnado afronta agora a gravación. A rodaxe ten lugar en Entrimo desde o 23 ao 27 de outubro e conta coa participación de 17 estudantes do último e penúltimo curso do Grao de Comunicación Audiovisual. As actrices que participan son Mayka Braña, Beatriz Barcia, Ariadna Santana, Lydia Prada, Helena Jes e Sandra Folgar. O escenario elixido é a “casa do médico” de Entrimo, unha casa de estilo indiano.
Sobre o tema da webserie, o alumnado explica que "máis que adaptar literalmente La casa de Bernarda Alba, a nosa intención é dialogar con ela e demostrar que unha obra escrita hai case un século aínda pode falarnos de nós mesmos". A historia céntrase en como "catro irmás encerradas baixo o control de Bernarda enfróntanse ao desexo, aos celos e a un amor prohibido que ameaza con esnaquizar á familia" e como "baixo a aparente tranquilidade da casa comezan a xurdir segredos, rivalidades e desexos prohibidos". O ton da proposta "achégase á comedia negra, pero o conflito de fondo mantense intacto".
O equipo da UVigo sinala que a obra de Federico García Lorca serve como base xa que "moitos dos conflitos que expón seguen estando presentes na actualidade", como "a represión feminina, os conflitos familiares, o peso do poder masculino ou a loita entre o que queremos e o que se espera de nós". A webserie tamén quere ser unha homenaxe ao escritor cando se cumpren 90 anos do seu asasinato.
O obxectivo principal do alumnado é "aproveitalo para adquirir experiencia práctica e enfrontarnos ás distintas necesidades e dificultades que implica sacar adiante unha peza audiovisual". Buscan "completar o proxecto de principio a fin e conseguir unha obra coidada, coherente e con identidade propia", ademais de "aprender do proceso, mellorar a nosa capacidade de traballo en equipo e adquirir ferramentas e experiencia".
O profesor da UVigo Paulino Pérez, director do taller Cemac, subliña que a experiencia "é moi positiva pois é moi parecida a unha rodaxe real: traballo cun orzamento pechado, desenvolvemento por departamentos e, moi importante, convivencia e traballo en equipo. É unha oportunidade fantástica para que o noso alumnado poña en práctica todos os coñecementos aprendidos no grao".
