O proxecto desenvólvese no Grupo de Investigación en Tecnoloxía Encimática e Bioestruturas (Teze), integrado no Instituto de Agroecología e Alimentación (IAA) e no Campus Auga. A iniciativa conta con financiamento da Xunta de Galicia e da Universidade de Vigo a través de axudas á formación posdoutoral.
Os investigadores sinalan que a composición destas algas varía segundo a estación do ano, o que inflúe nas súas propiedades. Ata o momento, identificaron fraccións ricas en azucres como a galactosa, a manosa e a glicosa. Estes compostos teñen potencial para sectores como a alimentación, a nutrición, a cosmética e a biotecnoloxía.
O estudo pormenorizado e a caracterización exhaustiva dos polisacáridos presentes en Codium spp. constitúe un paso fundamental e previo para a súa valorización na obtención de novos ingredientes funcionais.
Para avanzar na investigación, o equipo iniciou unha colaboración coa Universidad de Oviedo co fin de realizar a identificación taxonómica das mostras. Posteriormente, a investigadora Andrea Rodríguez continuará esta liña de traballo mediante unha estancia no KTH Royal Institute of Technology, en Suecia, onde se analizará a estrutura molecular dos polisacáridos mediante técnicas avanzadas.
