A Universidade de Vigo e Indra Group presentaron este martes no campus de Ourense a nova Cátedra Indra en Sistemas Aéreos Autónomos. Esta iniciativa nace co obxectivo de establecer unha colaboración continuada entre ambas entidades en actividades relacionadas coa formación, divulgación, transferencia e fomento da I+D+i no campo da aviación non tripulada, sistemas de guiado, RPAS e sistemas de aeronaves non tripuladas.
A actuación enmárcase na aposta da Xunta de Galicia e Indra, en colaboración coa UVigo e a través da iniciativa Civil UAV, “por consolidar Galicia como un polo de referencia en innovación, desenvolvemento tecnolóxico e talento vinculado ao ámbito aeroespacial e dos sistemas non tripulados”.
Na presentación participaron Carmen García Mateo, reitora da Universidade de Vigo; María Jesús Lorenzana, conselleira de Economía e Industria da Xunta de Galicia; José Luis Albo, responsable de Indra Group en Galicia; Nieves Lorenzo, directora da Escola de Enxeñaría Aeronáutica e do Espazo da Universidade de Vigo; e Fernando Veiga, profesor da UVigo e director da cátedra. García Mateo destacou que a iniciativa representa “o modelo de universidade que queremos: unha institución capaz de aproveitar as súas fortalezas, conectada co tecido empresarial e que transforma o coñecemento en oportunidades reais para a sociedade”.
José Luís Albo explicou que o acordo exemplifica o compromiso de Indra coa procura de talento especializado e a colaboración na formación universitaria e profesional, contribuíndo á innovación tecnolóxica e ao desenvolvemento industrial. Indra Group é unha multinacional española de referencia en defensa e dixitalización avanzada, con ingresos de 5457 millóns de euros ao peche do exercicio 2025.
María Jesús Lorenzana felicitou á Universidade de Vigo e a Indra pola súa confianza no talento galego e desexou que a colaboración xere novas actividades formativas e proxectos de investigación. Subliñou que a cátedra é unha ferramenta para contribuír á autonomía tecnolóxica, investigando, deseñando e desenvolvendo sistemas esenciais con coñecemento propio.
Fernando Veiga destacou que a Cátedra é unha oportunidade para traccionar a ciencia aeroespacial en Ourense, centrándose en aplicacións civís dos drones como a loita contra incendios forestais ou o salvamento marítimo. A colaboración achega ao estudantado traballos de fin de grao e mestrado sobre problemas reais e contacto directo coa industria, sendo clave para a captación e retención de talento en Galicia.
O convenio recolle actividades de formación (traballos fin de grao e mestrado, prácticas), divulgación e transferencia (charlas, eventos de reto universitario, actividades STEM para visibilizar o papel da muller) e fomento da I+D+i (convocatorias de doutoramento industrial, estudos sobre seguridade de voo de drones, navegación aérea autónoma).
