Os Premios Paraugas, promovidos polo Clúster da Comunicación de Galicia, recoñecen o traballo de profesionais e institucións do sector. Nesta edición, tres proxectos de estudantes da Facultade de Comunicación da Universidade de Vigo foron seleccionados como finalistas na categoría de estudantes, que busca dar visibilidade ao talento emerxente.
Larissa da Silveira, alumna do Máster en Dirección de Arte en Publicidade, foi nomeada finalista polo seu proxecto Galego de peto, un minidicionario-chaveiro deseñado xunto á súa irmá Leticia da Silveira. O proxecto é unha homenaxe á lingua galega e á súa propia chegada a Galicia, conectando a súa infancia no Brasil coa terra de orixe do seu avó.
Outro proxecto finalista é Frecha, sigue tu camino, unha marca de cadernos de viaxe inspirada no Camiño de Santiago, creada por Micaela Mosquera, Renan Fraga e Valentina Rodríguez, tamén estudantes do Máster en Dirección de Arte en Publicidade. A proposta busca reflectir os intereses dos creadores e a súa conexión con Galicia.
Lara María Chao, alumna do Grao en Publicidade e Relacións Públicas, opta ao galardón polo seu vídeo Despierta humano, crea. A peza reflexiona sobre o uso da intelixencia artificial no sector publicitario, alertando sobre a perda de criterio e a uniformidade que pode xerar.
A gala de entrega dos Premios Paraugas celebrarase este venres no Teatro Jofre de Ferrol.
