O proxecto de lei de orzamentos, aprobado onte no Consello da Xunta, dá continuidade ao apoio á Universidade de Vigo no sostemento de programas de investigación, incluíndo formación predoutoral, posdoutoral e doutoramentos industriais, grupos de investigación, e científicos recoñecidos polo Consello Europeo de Investigación. Tamén se apoiarán os cinco centros de investigación singulares de excelencia, centros colaborativos da rede CIGUS e a construción do novo Centro de Investigacións Mariñas (CIM) no edificio Siemens da ETEA.
O titular do departamento educativo explicou que os Orzamentos 2027 tamén reflicten o esforzo económico vinculado ao Acordo sindical de mellora educativa, que implicará contar con 956 docentes máis no curso 2026/27, ademais de reforzar a atención á diversidade.
Outras partidas relevantes inclúen os apoios para libros de texto e material escolar, así como para comedores escolares. Estes últimos cobren os xestionados directamente pola Xunta, convenios con concellos e subvencións para ANPAS, ademais de axudas a usuarios de comedores non xestionados polo Goberno galego.
O desenvolvemento do Marco galego para o impulso educativo, o programa de auxiliares de conversa e a implementación do proxecto EdugalIA son outros proxectos destacables para 2027.
