O proxecto de investigación Toxi-Feed, dirixido pola investigadora Ayelén Blanco do grupo PhysToFish, analiza como os contaminantes presentes nos pensos acuícolas afectan á alimentación e metabolismo da troita arco da vella. O estudo, que se executará ata 2028, conta co financiamento da Xunta de Galicia a través da convocatoria de Consolidación e estruturación de unidades de investigación competitivas do SUG.
A alimentación representa ata o 70% do custo de produción acuícola. Aínda que regulados, os pensos poden conter contaminantes que a longo prazo afectan procesos esenciais nos peixes. "Estudar estes contaminantes permite anticipar problemas, protexer o benestar animal e garantir unha produción acuícola segura e eficiente", afirma Ayelén Blanco.
Toxi-Feed céntrase en dous contaminantes modelo: o PCB-126, asociado á fariña de peixe, e a aflatoxina B1, vinculada a ingredientes vexetais. "Este cambio na composición dos pensos... introduce tamén novos riscos que é preciso comprender e anticipar", explica a investigadora, quen engade que o traballo busca comprender a nivel molecular como estes compostos alteran o apetito e o metabolismo.
O proxecto combina experimentos con peixes e estudos celulares para analizar o impacto molecular dos contaminantes. Ademais, avalía se a inclusión de determinados aminoácidos pode contrarrestar os efectos negativos destas substancias, abrindo a porta a pensos máis seguros e funcionais.
Ao remate do proxecto agárdase obter unha comprensión detallada dos efectos dos contaminantes e demostrar a eficacia das estratexias nutricionais. Os resultados servirán de base para optimizar a formulación dos pensos, mellorar o benestar animal e contribuír a unha acuicultura máis sostible e competitiva.
