A Cátedra de Feminismos 4.0, unha iniciativa conxunta da Deputación de Pontevedra e a Universidade de Vigo, xa ten aberto o prazo de presentación de candidaturas para a nova edición dos Premios GirlGeekPower, correspondentes ao curso académico 2026/2027. O obxectivo destes galardóns é incentivar, visibilizar e fomentar as vocacións nas áreas STEM (Ciencias, Tecnoloxía, Enxeñaría e Matemáticas) entre o alumnado feminino dos campus de Vigo e Pontevedra.
A convocatoria está dirixida a mozas que cursan estudos STEM na UVigo, distinguindo a súa excelencia académica e a súa reflexión crítica sobre a fenda de xénero en campos tradicionalmente masculinizados. Repartiranse 6.000 euros en total: 2.000 euros para cada unha das dúas gañadoras principais e 1.000 euros para cada un dos dous accésits, distribuídos entre as ramas de Ciencias e Ciencias da Saúde e de Enxeñaría e Arquitectura.
Para poder concorrer, as aspirantes deben estar matriculadas no curso 2026/2027 en polo menos 30 créditos dun grao ou máster oficial nas ramas obxecto da convocatoria, impartido en escolas ou facultades da provincia de Pontevedra da UVigo. As alumnas de grao necesitarán ter superado un mínimo de 60 créditos, e todas as candidatas deberán presentar unha nota media igual ou superior a 7 en Enxeñaría e Arquitectura, ou a 8 en Ciencias e Ciencias da Saúde. Non poderán participar aquelas que xa fosen premiadas previamente no mesmo nivel de estudos.
A avaliación das candidaturas considerarase tanto o rendemento académico como unha carta de motivación. Neste documento, as participantes expoñerán as razóns da súa elección de estudos e reflexionarán sobre a súa experiencia como mulleres nun contorno académico e profesional aínda marcado por estereotipos de xénero.
O prazo de solicitudes está aberto ata o 19 de outubro ás 23:59 horas e a presentación realízase a través do formulario habilitado na Secretaría Virtual da Universidade de Vigo. A comisión avaliadora estará presidida por Edita de Lorenzo (profesora do Departamento de Teoría do Sinal e Comunicacións) e María de los Ángeles Peña (profesora do Departamento de Química Física), e contará tamén coa participación de Lucía Muradas (xefa do Servizo de Igualdade da Deputación de Pontevedra) e Marta Caldas (adxunta ao Servizo de Igualdade).
