A cidade olívica acollerá unha nova edición do festival, presentada polo comisario do Xacobeo 2027, Marcos Gómez Román, e a delegada territorial da Xunta en Vigo, Ana Ortiz. O evento contará coas actuacións de bandas e artistas como Ed Harcourt, Cloud Nothings, Opus Kink, Maquina, Throes + The Shine, The Monsters, Electric Six e ST. Paul & The Broken Bones.
Os concertos distribuiranse por diferentes espazos da cidade, incluíndo a Biblioteca do Real Club Náutico, as salas Kominsky, Ocean, Doppler e Masterclub, ademais do Teatro Afundación.
Tras oito edicións de éxito, o Underfest Xacobeo, que xa esgotou abonos en edicións anteriores, confírmase como unha das citas musicais máis singulares de Galicia, destacando pola súa diversidade de estilos, aposta por aforos reducidos e a proximidade entre artistas e público.
Esta iniciativa conta co apoio de Turismo de Galicia, a través de Concertos do Xacobeo, un programa que impulsa Galicia como destino de música en directo e que xa apoiou máis de 185 eventos en 2025.
