O programa, que se desenvolverá durante o curso 2026-2027, ten como obxectivo formar, sensibilizar e implicar á comunidade escolar galega na transición cara a unha economía circular e na mellora da xestión dos residuos. A conselleira de Medio Ambiente e Cambio Climático, Ángeles Vázquez, presentou a iniciativa hoxe no CEIP Plurilingüe Manuel Laxeiro de Vigo.
A inscrición para esta primeira edición está aberta dende hoxe ata o vindeiro 31 de outubro. A iniciativa busca simplificar a concepción da economía circular, promovendo o aproveitamento de recursos, a reutilización e a reparación.
Entre as accións incluídas figuran obradoiros formativos prácticos, apoio pedagóxico ao profesorado con material específico, e a creación dun foro dixital e dun espazo web propio do programa. Os centros participantes recibirán o distintivo Escola EcoCircular polas súas boas prácticas.
Ademais, porase en marcha o concurso Misión Circular, que premiará con 5.000, 2.500 e 1.500 euros as ideas máis innovadoras propostas polos colexios para aplicar os principios da economía circular no seu día a día, como o fomento da reciclaxe ou a xestión de residuos.
A conselleira destacou que esta iniciativa é un paso máis para formar a unha nova xeración capaz de consumir de forma máis responsable e aproveitar mellor os recursos, marcando a diferenza no futuro.
