A falsificación de produtos e documentos é un problema global que afecta a múltiples sectores. A Universidade de Vigo participa no proxecto europeo QuantumPUF, sendo a única entidade española, co obxectivo de desenvolver unha nova xeración de tecnoloxías baseadas en principios cuánticos e fotónicos para verificar a autenticidade de obxectos físicos e documentos.
O Vigo Quantum Communication Center (VQCC) da UVigo lidera o paquete de traballo dedicado aos requisitos de seguridade e á súa implementación práctica. "O noso principal obxectivo será estudar ata que punto estes novos dispositivos poden ofrecer garantías reais de autenticidade e resistencia á falsificación", explica Davide Rusca, investigador do VQCC responsable da investigación.
Coordinado polo Instituto de Telecomunicações de Portugal, QuantumPUF conta cun orzamento de case tres millóns de euros do programa Horizon Europe e terá unha duración de catro anos. O proxecto reúne sete socios de Portugal, España, Alemaña, Suíza e Croacia, e a achega da UVigo roza os 300.000 euros.
O proxecto busca avanzar no desenvolvemento de funcións físicas non clonables (PUF) baseadas en materiais luminiscentes, como nanopartículas híbridas e complexos de lantánidos. Estas solucións, que poderán ser lidas por sistemas ópticos portátiles integrados en teléfonos intelixentes, pretenden facilitar a verificación da autenticidade de produtos e documentos.
A contribución da UVigo céntrase en avaliar as garantías de seguridade e resistencia á falsificación dos novos dispositivos, identificar vulnerabilidades e protexelos fronte a ataques. "Non abonda con fabricar un dispositivo difícil de reproducir: é necesario tamén determinar baixo que condicións pode ofrecer garantías de seguridade e como estas poden verificarse na práctica", sinala Rusca.
A iniciativa, que arrancou cun encontro en Lisboa, busca establecer un marco común para desenvolver mecanismos de autenticación máis resistentes á clonación e ás ameazas da computación cuántica, ademais de ser portátiles, eficientes e respectuosos co medio ambiente.
