Ao longo das tres xornadas de traballo, expertos, persoal investigador, estudantes de doutoramento e representantes do sector empresarial abordarán os últimos avances nas tecnoloxías que permiten avanzar cara unha auga máis limpa e un futuro máis sostible. O evento conta co respaldo da International School on Environmental Applications of Advanced Oxidation Processes (IPS-AOP), unha rede científica de referencia neste ámbito, integrada por investigadores de 25 países. A organización local está liderada por Ángeles Sanromán e Marta Pazos, investigadoras de Cintecx, Centro de Investigación en Tecnoloxías e Procesos Industriais da Universidade de Vigo.
O simposio botou a andar este xoves cun acto de apertura no que participaron Manuel Martínez, vicerreitor de Investigación da UVigo; David Patiño, director do Cintecx; José Fariña, director da EE Industrial e as dúas organizadoras. Destacouse a importancia de eventos coma este para dar acubillo tanto a investigadores con experiencia como a mozos que inician a súa carreira. Tamén se subliñou a idoneidade de reunir grupos de investigación de diferentes países, xa que o da auga é un desafío global que "se resolve localmente planta por planta, río por río, cidade por cidade", pero que "non respecta fronteiras e tampouco debería facelo a ciencia que o aborda", segundo palabras do vicerreitor.
O vicerreitor e o director do Cintecx dirixíronse especificamente aos estudantes de doutoramento, lembrándolles a importancia de participar nestes eventos para tecer sinerxías e coñecer persoas coas que poden establecer redes de traballo no futuro. "Facede preguntas aínda que vos parezan demasiado simples; explicade a vosa tese a alguén dun país e un campo diferente", aconsellaron.
O obxectivo principal deste evento é promover o intercambio de coñecementos científicos e tecnolóxicos nos procesos de oxidación avanzados (AOP) aplicados á descontaminación da auga e a protección do medio ambiente. Presentaranse os avances máis recentes e fomentarase o debate científico, promovendo a colaboración interdisciplinar entre universidades, centros de investigación e o sector industrial. O programa combina conferencias plenarias, comunicacións científicas, sesións de pósteres e mesas redondas.
Tras a introdución sobre a IPS-AOP, a cargo de Luigi Rizzo (Universidade de Salerno) e Sixto Malato (Plataforma Solar de Almería), comezaron as intervencións científicas. A xornada de hoxe céntrase nos fundamentos dos procesos de oxidación avanzados, mentres que a de mañá abordará as súas aplicacións. A primeira comunicación foi de André Torres-Pinto (Universidade de Porto) sobre procesos (foto)catalíticos heteroxéneos.
Un aspecto singular do encontro é a conexión entre a investigación científica e a realidade industrial. Os asistentes visitarán o venres as instalacións de tratamento de augas residuais e a planta potabilizadora de Aqualia para coñecer aplicacións reais destas tecnoloxías. O encontro rematará cunha mesa redonda e a entrega de premios ao mellor póster e á mellor presentación breve.
