O vestíbulo principal do edificio de Ciencias Experimentais, sede das facultades de Bioloxía, Ciencias do Mar e Química, conta dende este curso cun mural inspirado na biodiversidade das costas da ría de Vigo. A intervención, impulsada polas facultades de Bioloxía e Ciencias do Mar, ten como obxectivo humanizar a entrada do edificio e fomentar un espazo de encontro para o estudantado, reforzando ademais a identidade compartida dos dous centros.
A idea xurdiu da necesidade de transformar unha zona do vestíbulo que antes albergaba caixas de correo. Buscouse crear un lugar acolledor tanto para a comunidade universitaria como para o público que acode ao salón de actos, empregado para actividades internas e eventos abertos á cidadanía. "Buscamos crear un lugar de encontro para o estudantado e humanizar a entrada das facultades", sinala Elsa Vázquez, directora do Centro de Investigación Mariña da Universidade de Vigo, quen tamén mencionou iniciativas similares noutros centros da institución, como o da Facultade de Química.
A elección da ría de Vigo e os seus hábitats como motivo do mural responde á súa condición de elemento representativo dos dous centros. A obra busca reflectir a riqueza natural da contorna e conservar simbolicamente a presenza da fauna mariña que estivo presente no vestíbulo durante 25 anos, antes da retirada das esculturas por deterioro. A obra é unha interpretación artística que non representa un lugar concreto, senón a biodiversidade costeira da ría.
A intervención enmárcase nunha estratexia máis ampla para mellorar a imaxe e a funcionalidade dos espazos. A decana de Ciencias do Mar, Cristina Sobrino, destaca que o propósito é que o estudantado se sinta a gusto e participe máis na vida universitaria. A nova zona de descanso xunto ao mural xa tivo boa acollida, e estúdanse espazos similares noutros puntos do centro, así como a renovación da pintura dalgunhas aulas, dependendo dos recursos dispoñibles.
