O sector aeroespacial está á vangarda do desenvolvemento tecnolóxico, con avances que impactan en múltiples áreas como a agricultura de precisión ou a monitorización de incendios. Co obxectivo de afondar en como a innovación aeroespacial está a redefinir a xestión ambiental e agraria e a resposta aos grandes retos ecolóxicos actuais, o campus de Ourense acolle este xoves e venres a celebración do VI Congreso Internacional do Campus Auga. Na cita, arredor de medio centenar de axentes do sector público e privado exploran o uso de satélites, plataformas de grande altitude, drons e tecnoloxías de teledetección, "ferramentas que están a revolucionar a forma en que observamos, analizamos e xestionamos o territorio".
O congreso, baixo o lema "Sistemas aeroespaciais para respostas multisectoriais ante desafíos ambientais", está organizado pola Escola de Enxeñaría Aeronáutica e do Espazo e a Vicerreitoría do Campus de Ourense, e promovido polo Campus Auga. Na súa apertura, Nieves Lorenzo, directora da escola organizadora, salientou que o congreso busca "amosar dun xeito integrador como a aeronáutica non é unha cousa afastada do noso día a día, senón que é algo que está en todas partes, necesitámola para a innovación tecnolóxica na agricultura, para afrontar o problema dos incendios, para o estudo climático e para a actuación en catástrofes naturais, entre outras moitas cousas".
Alberto Vaquero, director do Campus Auga, puxo en valor o congreso como "un espazo de converxencia" entre axentes públicos e privados do sector aeronáutico, que supón para Galicia "unha oportunidade estratéxica de primeira orde". José Alberto Díaz de Castro, secretario xeral de Universidades da Xunta de Galicia, felicitou a iniciativa e lembrou que "Ourense é un dos campus que ten un futuro máis positivo e prometedor".
Enrique Mallón, presidente do Consorcio Aeroespacial Galego, destacou as cifras do sector en Galicia: arredor de 1700 traballadores, máis de 60 empresas e máis de 180 millóns de facturación anual, cun crecemento constante. Subliñou que "Galicia é pioneira" en moitas solucións aeroespaciais, especialmente en aeronaves non tripuladas, e a importancia de "pór en valor a industria aeroespacial galega".
Rosendo Fernández, presidente do Inorde, salientou a conexión das temáticas do congreso co territorio, citando a viticultura e os incendios como exemplos próximos á provincia de Ourense.
O congreso inclúe 26 comunicacións, conferencias, mesas redondas e demostracións. A conferencia inaugural "GNSS R: innovación aeroespacial para comprender e responder aos desafíos ambientais" foi impartida por Estel Cardellach Galí, investigadora do Institut d’Estudis Espacials de Catalunya, quen explicou a técnica de reflectrometría con sinais de navegación, útil para agricultura, clima, meteoroloxía e medio ambiente.
O programa abordará a Agricultura de Precisión, Incendios Forestais, Cambio Climático e Xestión da Auga. Grupos de investigación da Universidade de Vigo, como Aerolab e GTA, presentarán proxectos sobre monitorización de cultivos, xestión hídrica, prevención de incendios e análise de riscos climáticos.
A conferencia de clausura será "Uso de pseudo-satélites para a vixilancia de ecosistemas e resposta ante catástrofes naturais", por Rubén Moreno, de Skydweller Aero. A clausura contará coa participación de Montserrat Cruz (vicerreitora do Campus de Ourense), Ángeles Vázquez (conselleira de Medio Ambiente) e Josefa de León (presidenta de Viratec).
