A Facultade de Historia do campus de Ourense acolleu a terceira edición das Xornadas de Investigación en Patrimonio, un espazo de encontro científico para o alumnado do Programa de Doutoramento en Protección do Patrimonio Cultural. Dez doutorandas e doutorandos presentaron os seus traballos, tanto de xeito presencial como virtual, abarcando desde a salvagarda do patrimonio inmaterial en Guano (Ecuador) ata a intelixencia artificial na reconstrución patrimonial.
As comunicacións agrupáronse en tres bloques temáticos. O primeiro, "Patrimonio, territorio e comunidade", incluíu estudos sobre patrimonio inmaterial, lagoas naturais galegas e paisaxe cultural. O segundo, "Memoria, representacións e construción do patrimonio", abordou o patrimonio sindical, a cultura material na terra Igbo, a conservación da Igrexa de Santa Maria Annunziata de Roccaverano (Italia) e a colexiata de Santa María de Sar (Santiago de Compostela).
No terceiro bloque, "Materialidade, memoria e investigación do patrimonio", presentáronse traballos sobre "medievalismos lúdicos" e o director de videoxogos xaponés Hidetaka Miyazaki, o fenómeno arqueoastronómico de San Miguel de Celanova e a IA xerativa na reconstrución patrimonial.
Ademais, Teresa Campos López, da Universidade do País Vasco, impartiu un obradoiro sobre socialización e transferencia da investigación patrimonial, mentres que Ramón Yzquierdo Peiró, director técnico-conservador do Museo Catedral de Santiago, presentou os últimos proxectos de investigación e conservación do patrimonio compostelán.
A programación, de modalidade semipresencial, busca dar continuidade á filosofía do Programa de Doutoramento Interuniversitario en Protección do Patrimonio Cultural das universidades de Vigo, Santiago de Compostela e A Coruña, que pretende xerar un espazo de encontro interprofesional para a protección do patrimonio.
