Oito investigadores e investigadoras do Cintecx, centro da Universidade de Vigo, foron recoñecidos nos Premios de Investigación sobre Emprendemento da institución. Estes galardóns, que distinguen teses doctorais e traballos de fin de máster e grao relacionados co emprendemento e a innovación, premiaron a oito membros do centro nunha convocatoria que recoñeceu un total de 22 traballos.
Entre os premiados atópanse César Álvarez Bermúdez, Saúl Díaz Rodríguez, Ahmed Mossad Ibrahim Elseicy e Gabriel Eduardo Suárez Fernández, galardoados polas súas teses doctorais en Enxeñaría e Arquitectura. María Pazo Rodríguez recibiu un premio na área de Artes e Humanidades. Ademais, Diego Costas Moyano e Pablo Alonso González foron recoñecidos polos seus Traballos de Fin de Máster, e Gadyel Aminadab De Morais Conceiçao polo seu Traballo de Fin de Grado.
Os premios valoran a creatividade, viabilidade e impacto económico e social das investigacións orientadas á innovación e ao emprendemento, co obxectivo de visibilizar iniciativas universitarias capaces de xerar desenvolvemento e transferir coñecemento.
Cinco teses doctorais premiadas abordan retos tecnolóxicos e ambientais, desde a valorización enerxética da biomasa ata a aplicación da intelixencia artificial en infraestruturas, minería e sistemas de transporte. A investigación de César Álvarez Bermúdez céntrase en modelos avanzados para simular sistemas de conversión térmica de biomasa. A de Ahmed Mossad Ibrahim Elseicy emprega intelixencia artificial para analizar datos de radar de penetración terrestre na avaliación de pavimentos. Saúl Díaz Rodríguez analizou o potencial do ozono para reducir depósitos en sistemas de escape, mentres que María Pazo Rodríguez explora modelos descentralizados de aprendizaxe automático para a toma de decisións en minería sostible. A tese de Gabriel Eduardo Suárez Fernández estuda o impacto das infraestruturas verdes e grises en redes de transporte mediante xemelgos dixitais, un traballo que xa recibiu o premio á mellor tese doutoral da Cátedra de Cambio Climático da Universidade de Oviedo.
Nos Traballos de Fin de Máster, Diego Costas Moyano desenvolveu unha ferramenta de agrupamento non supervisado para a análise enerxética de vivendas públicas de aluguer, e Pablo Alonso González creou unha ferramenta para a xestión da calidade da auga en encoros eutrofizados. Gadyel Aminadab De Morais Conceiçao completou a representación do Cintecx co seu premio no Traballo de Fin de Grado.




