O CINBIO da Universidade de Vigo reforza a súa aposta pola divulgación científica cunha nova oferta de actividades dirixidas a centros educativos preuniversitarios. A principal novidade é a apertura dun formulario en liña para que os centros de ensino secundario e bacharelato poidan reservar visitas aos seus laboratorios, unha experiencia inmersiva que permitirá ao alumnado coñecer de primeira man o desenvolvemento da investigación nun centro científico de referencia.
Durante tres horas, os grupos participantes poderán acceder a laboratorios profesionais, realizar actividades experimentais, coñecer persoal investigador e descubrir as liñas de traballo do centro en ámbitos como os nanomateriais e a biomedicina. O programa inclúe unha actividade participativa onde o alumnado deberá resolver retos e traballar en equipo.
A proposta busca ofrecer unha experiencia dinámica e participativa que permita ao alumnado entrar en contacto coa ciencia real e coñecer como a investigación desenvolvida en Vigo pode contribuír a mellorar o futuro. A iniciativa nace tras unha experiencia piloto con centros educativos, como o IES A Guía de Vigo, cuxa profesora, Trinidad Vázquez, destacou a visita como "extraordinariamente enriquecedora" e "moi recomendable" pola súa combinación de rigor científico, divulgación de calidade e adaptación ao nivel do alumnado.
Ademais das visitas, o CINBIO continuará impulsando o proxecto Nanotech, unha proposta divulgativa con recursos e materiais didácticos para traballar na aula sobre nanotecnoloxía, aplicacións de novos materiais e técnicas de manipulación da materia a escala atómica.
O centro tamén renovou o seu catálogo de relatorios divulgativos dirixidos a centros educativos, onde investigadoras e investigadores comparten o seu coñecemento e paixón pola ciencia. Os centros interesados poden consultar o catálogo e contactar co equipo de comunicación do CINBIO para coordinar a realización destas actividades.
Con estas iniciativas, o CINBIO reforza o seu compromiso coa conexión entre ciencia e sociedade, buscando achegar a investigación á cidadanía, fomentar vocacións científicas e impulsar a transferencia de coñecemento.
